by Charlie Anne Espiritu
Sino bang hindi nakakakilala kay Cinderella?
Iyong babaeng nakaiwan ng tsinelas sa hagdan?
Iniisip ko lang kung bakit nag-inarte pa siya
E pwedeng pwede naman niya 'yong balikan.
Meron pang isa,
Snowhite 'yung pangalan niya
Paborito niya siguro 'yung mansanas
O baka naman mahilig lang talaga siya sa prutas.
Kasi, kung hindi ako nagkakamali
Hindi naman siya gutom no'ng mga panahong 'yon
Paniguradong hindi rin naman siya naglilihi
Pero buti gumanda ang buhay niya pagkatapos malason.
Kaya hahanap ako ng hagdan
'Yung sobrang haba't sobrang taas
Kung sakaling ika'y mapadaan,
Iiwanan ko ang kabiyak ng aking Havaianas.
Makabili na nga rin ng mansanas sa kanto
Tapos hihimatayin ako kunwari
Baka lang naman kasi matagpuan mo ako
Syempre gusto ko rin ng marahang halik sa labi.
Pero sa sobrang tagal mo, nagbago na ang aking isip
'Di mo kasi naitatanong, madali akong mainip.
Ayoko na ng hagdan at mansanas sa ating pagtatagpo
Large fries na lang at Coke float sa McDo.
P.S.
Alas singko ng madaling araw tayo magkita
Para maiba naman.
At kapag ang araw ay pasikat na
Saka mo tanungin ang aking pangalan.
0 comments:
Post a Comment