Yakapin ang Liwanag

ni baliw-na-payaso

minsa'y napadpad sa isang eskinita

kagyat na nabulabog ang aking gunita

madilim, mapusok, kahindik-hindik

kasaysayan ng buhay sa gulo ay hitik

ilang ulit na kinupkop ng malamig na selda

utak ay inupos ng masamang droga

pamilyang mahal ay ako'y tinalikdan

buhay ko raw ay wala ng patutunguhan

durog na durog ang puso kong sawi

di na makabangon kung saan nakakubli

oh kadiliman! pulos kadiliman!

yayao na ba ako sa huling hantungan?

biglang di mawari kung ano'ng naganap

mistulang tinangay patungo sa alapaap

paligid ay nagliwanag, ako'y nagulat

may init na dumampi sa aking mga palad

iminulat ko ang aking mga mata

sa kasamaang palad, wala akong makita

wala akong marinig, di ko maintindihan

siguro ako'y naliligaw sa kawalan!

binalot ng magandang himig ang paligid

at narinig ko ang Kanyang tinig

ako pala'y hindi naligaw ng landas
ito pala'y daan tungo sa pag-ibig Nyang wagas

ako'y hindi na magsisinungaling
namuhay akong poot ang kapiling
galit sa diyos at galit sa sistema
ang pagkamuhi'y sa puso ko'y nanuot na

ngunit heto't nasa aking harapan
pagkakataong baguhin ang nakasanayan
isa pang pagkakataon ang ibinigay
upang buhay ay magkaroon ng saysay

minsan na akong kumapit sa patalim
minsang nanirahan sa mundo ng lagim
subalit ang panahong iyon at tapos na
hinding hindi ko na babalikan pa

maaring wasak nga ang sistema
dahil sadlak sa hirap ang masa
pero, kaibigan, huwag mong subukan
na ang kadiliman ay hagkan

tangan mo ang Kanyang kamay
at ramdamin ang liwanag ng buhay
kung sa tingin mo ang pag-asa ay wala na
tumingin ka sa kalangitan tsaka sabihing meron pa...